4 na Indonesian trainees nakatanggap ng letters of appreciation sa paghuli ng unggoy na nakakaperwisyo sa isang lungsod sa Japan

YAMAGUCHI — Apat na technical intern trainees mula sa Indonesia ang nakatanggap ng mga liham ng pasasalamat mula sa alkalde ng kanlurang lungsod ng Japan noong Agosto 18 dahil sa paghuli ng Japanese macaque o unggoy sa Ogori area kung saan umaatake ang mga unggoy sa mga residente.

Nagbigay si Mayor Kazuki Ito ng mga liham ng pasasalamat kay Gabriel Mawu, 29, at tatlo pang empleyado ng construction company na Choshu Kogyo na nakabase sa lungsod.  Bandang alas-9 ng gabi.

Noong Hulyo 28, isang unggoy ang pumasok sa dormitoryo ng kompanya kung saan nakatira si Mawu at ang iba pa sa pamamagitan ng bintana sa ikalawang palapag.  Tumalon ang unggoy papunta kay Mawu, ngunit hinawakan niya ang hayop gamit ang kanyang mga kamay, at nahuli ito kasama ng tatlong iba pang empleyado, na nagmamadaling tumulong matapos mapansin ang kaguluhan.

Kinalmot ng unggoy ang kanang braso ni Mawu, ngunit sinabi niyang, “papagaling na, kaya ayos na ako. Natutuwa ako na natapos na ang pag-aalala ng lahat.”

Ayon kay Mawu at sa kanyang mga kasamahan, karaniwan na ang pakikipagtagpo sa mga unggoy sa Indonesia, ngunit hindi kailanman inaatake ng mga ito ang mga tao dahil tumakas sila kaagad kapag nakakita ng tao.  Ngumiti ang apat at sinabing, “Sanay na kami sa unggoy.”

Sinabi ni Mayor Ito, “Nakatanggap kami ng maraming kahilingan mula sa aming mga mamamayan na papurihan ang apat na tao. Masayang-masaya ako na maibigay sa kanila ang mga liham ng pasasalamat.”

May kabuuang 66 katao sa lugar ng Ogori ang nasugatan sa mga pag-atake ng unggoy mula Hulyo 8 hanggang 28, ngunit ang mga katulad na insidente ay tumigil mula nang mahuli ng apat ang unggoy.

(Orihinal na Japanese ni Sawako Mori, Yamaguchi Bureau)